بعض أشعار مليحة الفودري

بعض من أشعار مليحة الفودري

من ديوان > <بقايا كحل من عيون سود>

محتاجه لك>

محتاجه أبكي وأنا قربك .. سنين

محتاجه للصبح الذي في داخلك

محتاجه أنسى

كل مشاويري وعذاباتي

وكل درب مشيته والأنين

محتاجه أغفى

في دفا عطرك

وأناي لك ..

عصافير الحنين ..

وتسقي ينابيعي..

ظمى رملك

وأسافرلك .. وأسافر بك ... وأسافر فيك

وانساني واغيب

محتاجه لك

لان الوله ... كل الوله

دمعة تبي تشتكي المغيب

ولان الفرح

بسمة من شفاه الحبيب

ولان الجفا

طفل فقد حضن الوفا

ولو اتبعك .. يمكن تبيع

والدنيا مثل الساقية

وجه الجروح الماضية

وأنا من دونك أضيع

حبي الوحيد>

خلني أعيش حبي الوحيد

خليني أحبك من بعيد

حتى لو قلبك لغيري تمنحه

حتى لو دمعي ف عيوني تلمحه

خلك سعيد بدنيتك

وآنا سعيد بشوفتك

بس الرجا .. كل الرجا

قلب المحب لا تجرحه

أدري أنا

قلبك أبد ما أملكه

وقلبي أنا

كله بدينك تملكه

مدري هو حظي ونصيبي

انك تحب غيري

واضل وحدي حبيبي

راضي أنا بكل العذاب

ولا ودي دمعي تمسحه

خلك سعيد بدنيتك

وآنا سعيد بشوفتك

بس الرجا .. كل الرجا

قلب المحب لا تجرحه

صوت الألم>

لو تسمعين الصمت

ياصوت الألم ... مره

كفاها ادموعنا تبكي ..... زمن

ما ملت الحسرة ؟

صدى ... والله العيون تخاف

صارت تكسر النظرة ...

وذلك اللي جرح ايده

من أول ما لمح سيده .... رماد أبيض

رضى يشرب من ادموعك

رضى يضحك ... هذيك الضحكة الصفرة ...

وفي زحمة من اضيوفه

ولجل ما ينتهي خوفه

نسى ووطى ولا يدري

على جمرة ....